Knapsak vol Karoo: Skeerseisoen

skeerseisoen

Die Glen Avon skeerspan.

In die ou Karoo-skeerhuis kry jy dikwels die gevoel van ‘n katedraal.  Gebou uit klip en sink, laat dit natuurlike lig in van bo, sodat die manne kan sien om te kan skeer en klas.

Die klanke – onvergeetlik.  Die skuur is gevul met die metaalagtige klik-klik van die swiepende skêr-lemme, die murmeling van die skeerders se stemme en die konstante geblêr van die skape en angorabokke.  Partykeer sal ‘n skaap luidkeels protesteer teen die onregverdige verlies van sy winterjas en  presies klink soos ‘n  stout kind wat ‘n tantrum gooi.

kc 2

Karoo Keepsakes nou vertaal in Afrikaans.

Elke vyf minute of so bring ‘n skeerder ‘n nuwe grootoog-dier in.  Hy knyp hom stewig tussen sy bene vas voor hy by die agterlyf begin en sy pad voornatoe oopknip.  Die stomme skaap versink in ‘n trans soos ‘n gehipnotiseerde hoender, terwyl sy wolvag netjies in een stuk, soos ‘n pels, afkom.

Die skeerder sit die verdwaasde skaap terug op sy pote en gee hom ‘n stewige raps, voor hy  deur die drukgang wegskarrel op pad na sy maters toe.  Die vaggooier dra die wol oor na die sorteertafel, waar hy dit met ‘n dramatiese wye boog oor die belatte oppervlak, glad geolie van al die lanolien, oopsprei.  Die gradeerders drom nader, bêre hulle hande diep in die wol en begin voel en kyk na die lengte en tekstuur van die vesel.

Alles in ‘n Karoo-skeerhuis is tradisieryk, van die skaapskêre tot die tafel en die wolpresse.  As dit kom by skêr-skeer, is die Suid-Afrikaners die voorstes ter wêreld.   Die legendariese Zwelile Hans wat in Sterkspruit in die Oos-Kaap woon, verniel op gereelde basis sy teenstanders uit Australië en Nieu Seeland op die wêreld se skeerverhoë.

Uittreksel uit Knapsak vol Karoo I, deur Chris Marais en Julienne du Toit (MLM Uitgewers, 2009). Vertaler: Melina Smit. Redigering: Jurie & Elsje Taljaard.

Kom kuier gerus by ons nuwe e-Boekwinkel.

, , ,

No comments yet.

Leave a Reply