Uit Klip Gekerf

Daar’s ‘n inskripsie op ‘n rots bo-op Oukop, ‘n heuwel wat waghou oor Cradock, wat lees: “what availe it a man that he gain the whole world, but lose his own soul.”

In ‘n moderne samelewing, blootsgery deur materialisme, kan daar nie ‘n waarder waarskuwing gedurende enige era wees vir ‘n dorp en sy mense as hierdie een, wat kort na die draai van die eeu deur ‘n Britse soldaat ingebeitel is nie. Dis natuurlik ‘n aanhaling uit die Bybel – Matteus 16 vers 26. Of dit egter na Britse koloniale vraatsug verwys of nie, is nou vir altyd verlore in die wasem van tyd.

kc 2 — Karoo Keepsakes nou vertaal in Afrikaans.

In hierdie deel was daar gereeld so tussendeur die oorlog ook nou en dan ‘n skietstilstand. Op Salpeterskop, digby Cradock, is ‘n skaakbord ingeëts in die ysterklip. Hiervandaan is skaakskuiwe met die hulp van ‘n heliograaf oor en weer gesein na ander skaakspelers op nabygeleë koppies en ook na die kloktoring van die plaaslike Moederkerk.

Na ‘n spesifieke skermutseling in dié area, is ‘n Tommie Cradock toe gestuur om ‘n ambulanskontingent te gaan haal. Intussen het die gewonde Britte saam met hul Boere- vyande ‘n paar bottels whiskey pakgegee om die tyd om te kry.

Dit is aangeteken dat ‘n sekere Mevrou van Heerden God save the Queen gespeel het toe die Britse magte op haar plaas aangekom het – en die Volkslied van die Republiek van die Transvaal toe ‘n Boerepatrollie ‘n wyle later opgedaag het op soek na rantsoene en vars perde. Oorlog het nog altyd sy eksentrieke oomblikke gehad.

Uittreksel uit Knapsak vol Karoo I, deur Chris Marais en Julienne du Toit (MLM Uitgewers, 2009). Vertaler: Melina Smit. Redigering: Jurie & Elsje Taljaard.